ලබන 26 වනදා සිය එක්දින ක්‍රිකට් ජීවිතයෙන් සමුගන්නා සුපිරි පන්දු යවන්නා ලසිත් මාලිංග සිය පවුල සමග ඕස්ට්‍රේලියාවේ පදිංචියට යාමට සුදානම් බවට ක්‍රිකට් ආරංචි මාර්ග වාර්තා කර තිබේ.
ඔහුගේ අවසන් තරගය බවට පත්වනු ඇත්තේ තරග 3 කින් යුතු සංචාරක බංග්ලාදේශ තරගාවලියේ පළමු එක්දින තරගයයි.මාලිංග එංගලන්තයේ ලෝක කුසලාන තරග සංචාරයෙන් පසු සිය පවුලේ සාමාජිකයින් සමග ඕස්ට්‍රේලියාව
බලා ගොස් තිබුණි.
පසුගිය දිනවල සිය ඕස්ට්‍රෙලියානු නිවහනේ සිට ඉදිරි වැඩ සැලසුම් කරමින් සිටි මාලිංග තේරිම් කමිටු සභාපති අසන්ත ද මැල් හට ඕස්ට්‍රේලියාවේ සිට දුරකථන ඇමතුමක් ලබාදී පවසා ඇත්තේ බංග්ලාදේශ තරගවලට සහභාගිවිම සදහා තමන් අද (22)  ශ්‍රි ලංකාවට පැමිණිමට හැකි බවයි.
ඕස්ට්‍රේලියාවේ පදිංචියට යාමේන් අනතුරුව ලසිත් මාලිංග එහි පුහුණුකරුවෙක් වශයෙන් කටයුතු කිරිමේ සුදානමක් පවතින බවටද තොරතුරු  ලැබී තිබේ.
තේරීම් කමිටුව විසින් මුළු තරගමාලාවම ක්‍රීඩා කරන ලෙස ඔහුගෙන් ඉල්ලා සිටියද, පළමු තරගය අවසන් වීමෙන් පසුව තමා නතරවන බව මාලිංග දන්වා ඇත.
එක්දින ක්‍රිකට් පිටියේ ඉනිම 219 කදී කඩුලු 335 ක් රැස්කරමින් ශ්‍රී ලංකාවේ තෙවැනි වැඩිම කඩුලු ලාභියා වූ ඔහු තෙවැනියා වන්නේ මුත්තයියා මුරලිදරන් (523) සහ චමින්ද වාස් (399) දෙදෙනාට පමණි.
ටෙස්ට් ක්‍රිකට් පිටියේදී කඩුලු 100 ක් හෝ ඊට වැඩි ප්‍රමාණයක් ලබා ගත් ශ්‍රී ලංකා පන්දු යවන්නන් හත් දෙනාගෙන් එක් අයෙකු වන මාලිංග සිය වෘත්තීය ජීවිතය තුළ දණහිසේ ආබාධ නිසා ටෙස්ට් තරග අතහැර දැමීමට තීරණය කළ අයෙකි.
පාසල් කාලයේ ගාල්ල රත්ගමදී මෘදු පන්දු ක්‍රිකට් ක්‍රීඩා කරමින් සිටියදී ඔහුගේ යෞවන වයසේදී හිටපු ශ්‍රී ලංකා පන්දු යැවීමේ පුහුණුකරු චම්පක රාමනායක විසින් සොයාගත් මාලිංග ඔහුගේ සාම්ප්‍රදායික නොවන පන්දු යැවීමේ ක්‍රියාවලිය නිසා කැපී පෙනුණි.
ඉන්පසු ඔහු ලෝකයේ වඩාත්ම තාක්‍ෂණිකව නිවැරදි පිතිකරුවන් පවා භීතියට පත් කරන යොර්කර් පන්දු යවන්නෙකු වූ අතරම එය ඔහුගේ වෘත්තියේ ලාංඡනය විය.
ඔහු මේ වසර මුලදී නවසීලන්තයේ පැවති එක්දින තරගාවලියකට නායකත්වය දුන්නේ දිනේෂ් චන්දිමාල් වෙනුවට නායකයා ලෙස පත් වීමක් ලැබීමෙනි නමුත් “අභ්‍යන්තර කැරැල්ල” හේතුවෙන් ලෝක කුසලානය සඳහා ඔහු නායකයා ලෙස නම් කර තිබුනේ නැත.
 මාලිංගගේ ඉවත්වීම ශ්‍රී ලාංකික ක්‍රිකට් ක්‍රීඩාවට බලවත් පහරක් වනු ඇත.
කෙසේ වෙතත් මාලිංගගේ ඉවත්වීම ගැන අදහස් දක්වා ඇති තේරීම් ප්‍රධාන අසන්ත ද මෙල්
“මාලිංගගේ විශ්‍රාම යාමෙන් අපට ඊළඟ පරම්පරාවේ වේග පන්දු යවන්නන් සොයා ගැනීමට හා පෝෂණය කිරීමට හොඳ අවස්ථාවක් ලැබෙනු ඇත” යනුවෙන් මාධ්‍ය වෙත අදහස් දක්වා තිබේ.

2019 එංගලන්ත-වේල්ස ලෝක කුසලානය දැන් ඇරඹී හමාරය.
තරග උණුසුම, දිනුම - පැරදුම හයේ හතරේ පහරවල් මෙන්ම තිරයෙන් පිටුපස සිදුවන බොහෝ දේ පිළිබඳව ප්‍රේක්ෂක අවධානය යොමුවෙයි.
ඒ අතරින් බොහෝ දෙනාගේ උනන්දුවට පාත්‍ර වී ඇත්තේ රූපවාහිනි තිරයෙන් පන්දුවට පිත්තට පණ දෙන කාන්තා කටහඬ කිහිපය වෙතයි.
එනම් මෙවර ලෝක කුසලාන විස්තර විචාරක මඬුල්ලට එක්වී සිටින කාන්තාවන් තිදෙනා වෙතය.
අන්තර්ජාතික ක්‍රිකට් කවුන්සිලය විසින් පසුගිය මාසයේ නම් කළ විස්තර විචාරක මඬුල්ල විසිහතර දෙනකුගෙන් සමන්විතය.
පිටියේදී පන්දුවෙන් පිත්තෙන් දස්කම් දැක්වූ ප්‍රවීණයන් මෙන්ම හිටපු ක්‍රිකට් නායකයන්ගෙන්ද යුතු වූ මේ විසි හතර දෙනා අතරට කාන්තාවන් තිදෙනකු ද අයත් වීම විශේෂිත කාරණයකි.
මේ අපූරු කාන්තා කටහඬ තුන අයිති වන්නේ හිටපු එංගලන්ත ක්‍රීඩිකා ඊෂා ගුහා, හිටපු ඕස්ට්‍රේලියා ක්‍රීඩිකා මෙලනි ජෝන්ස් හා ප්‍රවීණ එංගලන්ත හා BBC නිවේදිකා ඇලිසන් මිචෙල්ටය.
මොවුන් තිදෙනා මෙසේ එක්වීම විශේෂ වන්නේ එබඳු කාන්තා නියෝජනයක් ලෝක කුසලානයට සමගාමීව සිදුවන පළමු අවස්ථාව මෙය බැවිනි.
රූපවාහිනි නිවේදනය සම්බන්ධව ගත් කල මේ තිදෙනාගෙන් වඩාත් පළපුරුදුකාරිය වන්නේ විවිධ ක්‍රීඩා වෙබ් අඩවි, විස්ඩන් ක්‍රිකට් සඟරාව, ටයිම්ස් හා ද ගාර්ඩියන් වැනි පුවත්පත් සමඟ ලේඛිකාවක ලෙසද කටයුතු කරන ඇලිසන් මිචෙල්ය.
ඇලිසන් මිචෙල් දක්ෂතා දක්වන්නේ ක්‍රිකට් පිටියේ සිදුවන දෑ වචනවලට හරවන්නට පමණක් නොවේ.
ඇය මලල ක්‍රීඩා, ටෙනිස්, ගොල්ෆ්, ජිම්නාස්ටික් ආදී වශයෙන් වූ විවිධ ක්‍රීඩා සජීවීව ප්‍රේක්ෂකයා වෙත ගෙන එන්නට තම කටහඩින් දායක වන්නීය.
ගුවන් විදුලි නිවේදනයෙන් තම ආගමනය සිදුකළ මිචෙල් කිසි දිනෙක තරගකාරී ක්‍රිකට් ක්‍රීඩාවේ යෙදී තිබුණු තැනැත්තියක නොවේ.
විවිධ ක්‍රීඩා පිළිබඳ අෑ සතු වූ මේ අපූරු දැනුමත් අවබෝධයත් හේතුවෙන් එකිනෙකට වෙනස් වූ බොහෝ ජාත්‍යන්තර ක්‍රීඩා ඉසව් ආවරණය කිරීම සඳහා ඇගේ කටහඬ යොදා ගැනිණ.
විම්බල්ඩන් ටෙනිස් තරගාවලි, 2014 පොදු රාජ්‍ය මණ්ඩලයීය ක්‍රීඩා උළෙල, බීජිං ඔලිම්පික් උළෙල, කාන්තා ක්‍රිකට් ලෝක කුසලානය, ICC චැම්පියන්ස් ක්‍රිකට් තරගාවලිය ආදී වශයෙන් ඉන් කිහිපයක් සඳහන් කරන්නට පුළුවන.
බී.බී.සී. ගුවන් විදුලිය සමඟින් ක්‍රීඩා විස්තර විචාරයට අත්පොත් තැබූ ඇය අද වනවිට චැනල් සෙවන්, චැනල් ෆෝ, ස්කයි ස්පෝට්ස්, ඊ.එස්.පී.එන්., ස්ටාර් ස්පෝර්ට්ස් වැනි විවිධ ආයතන සමඟ කටයුතු කරන්නීය.
දෙවැන්නිය වන්නේ හිටපු එංගලන්ත ක්‍රීඩිකා ඊෂා ගුහාය. ටෙස්ට් තරග අටකදී හා එක්දින තරග 83කදී එංගලන්තය නියෝජනය කළ ඊෂා ජාත්‍යන්තර ක්‍රීඩාවෙන් සමුගත්තේ 2012 වසරේදීය. 2009 වසරේ කාන්තා ක්‍රිකට් ලෝක කුසලානය තම රට වෙනුවෙන් දිනා ගන්නට එංගලන්ත පිල සමත් වෙද්දී ඊට දායකත්වය සැපයූ ක්‍රීඩිකාවක් ලෙසද ඇය හඳුනාගන්නට පුළුවන.
එක්දින තරග කඩුලු සියය ඉක්මවා දවාගන්නට සමත්වූ ඊෂා විස්තර විචාර අට්ටාලයට පා තබන්නේ 2012 වසරේදීය. ඒ ITV ක්‍රීඩා විකාශන ජාලයත් සමඟයි.
ඒ වසරේදීම ඇයට තවත් සුවිශේෂී කටයුත්තකට සම්බන්ධ වන්නට ලැබෙන්නේ මේ ITV නාළිකා සමූහය හරහාය. ඒ එම වසරේම ITV 4 නාළිකාව හරහා ඉන්දීය ප්‍රිමියර් ලීගය හා සම්බන්ධ වීමෙනි. ඉන්පසු ඇය තවත් පියවරක් තබමින් 2018 වසරේදී ස්කයි ස්පෝට්ස් සමඟ එක් වූවාය.
ඇගේ කටහඬ ක්‍රිකට් ක්‍රීඩාවට කොපමණ වැදගත් දැයි ඔප්පු කරන්නට මෙන් ඒ වසරේදීම ෆොක්ස් ස්පෝර්ට්ස් ජාලයද ඇය තම විස්තර විචාර කටයුතුවලට එක්කර ගත්තේය.
Ashes Cricket 17 නමැති පරිගණක ක්‍රීඩාව ඔබ උත්සාහ කර ඇත්තේ නම් මේ තුන් දෙනාගෙන් අනෙක් කටහඬ නොදන්නවා විය නොහැකිය.
ඒ ඕස්ට්‍රේලියාවේ මෙලනි ජෝන්ස්ය. 2007 අවුරුද්දේ චැනල් නයින් සමඟ ක්‍රිකට් විස්තර විචාරයට පය තැබූ මෙලනි ජෝන්ස් ජාත්‍යන්තර ක්‍රිකට් වරම් දිනාගත්තේ 1997 වසරේදීය.
පිතිකාරිනියක ලෙස දස්කම් පෙන්වූ මෙලනි ජෝන්ස් ඊට වසරකට පසුව ඕස්ට්‍රේලියාව වෙනුවෙන් ටෙස්ට් වරම ද දිනාගන්නට සමත් වූවාය.
ටෙස්ට් ශතකයකටද හිමිකම් කී ජෝන්ස් සරේ ප්‍රාන්තයේ කාන්තා ක්‍රිකට් කණ්ඩායමද නියෝජනය කළාය.
2015 වර්ෂය ඇගේ ක්‍රිකට් විස්තර විචාර ජීවිතයේ සුවිශේෂී කඩඉමක් සනිටුහන් කළ එකක් වූයේය. ඊට හේතුව වූයේ 2015 ඉන්දියානු ප්‍රිමියර් ලීගයේ විස්තර විචාරිකාවක් ලෙස කටයුතු කරන්නට ඇයට අවස්ථාව හිමි වීමයි.
ඕස්ට්‍රේලියාවේ ප්‍රධානතම කාන්තා ක්‍රිකට් ඉසව්ව වන කාන්තා බිග් බෑෂ් ලීගය සමඟද ඒ වසරේ එක්වූ ඇයට ඊළඟ තරග වාරයේදී බිග් බෑෂ් පිරිමි තරගාවලියේ විස්තර විචාරක අසුනක් හිමිවිය.
ඕස්ට්‍රේලියානු ස්වදේශිකයන් වෙනුවෙන් ක්‍රියාත්මක වන සෞඛ්‍ය වැඩසටහනකටද දායකත්වය සැපයූ ජෝන්ස් සමාජ සේවිකාවක ලෙසද නමක් දිනා සිටින්නීය.

2019 ලෝක කුසලාන ක්‍රිකට් තරගාවලිය දක්වා ශ්‍රී ලංකා කණ්ඩායමේ නායකයා ලෙසට දිනේෂ් චන්දිමාල් කටයුතු කරන බව ශ්‍රී ලංකා ක්‍රිකට් ආයතනය පවසනවා.
එමෙන්ම එළඹෙන එංගලන්ත සංචාරයේ එක්දින සංචිතයෙන් ඇන්ජෙලෝ මැතිව්ස් ඉවත් කර ඇති බවයි ශ්‍රී ලංකා ක්‍රිකට් ආයතනය සඳහන් කළේ.
මේ  අතර එංගලන්ත සංචාරයේ ටෙස්ට් තරගාවලියට එක්වන ශ්‍රී ලංකා සංචිතය ද නම්කර තිබෙනවා.
එහි නායකයා ලෙසට දිනේෂ් චන්දිමාල් නම්කර ඇති අතර දිමුත් කරුණාරත්න, කෞෂාල් සිල්වා, කුසල් මෙන්ඩිස්, ඇන්ජෙලෝ මැතිව්ස්, ධනංජය ද සිල්වා, රොෂේන් සිලවා සහ දිල්රුවන් පෙරේරා ඇතුලත්.
රංගන හේරත්, මලින්ද පුෂ්පකුමාර, අකිල ධනංජය, සුරංග ලක්මාල්, කසුන් රාජිත, ලහිරු කුමාර, ලක්ෂාන් සඳකැන් සහ නිරෝෂන් දික්වැල්ල ද ටෙස්ට් සංචිතයට ඇතුලත්.
අතිරේක ක්‍රීඩකයන් ලෙසට දුෂ්මන්ත චමීර, ජෙෆ්රි වැන්ඩසේ, ලහිරු තිරිමාන්න, කුසල්  ජනිත් පෙරේරා සහ නිශාන් පීරිස් නම්කර තිබෙනවා.
මේ අතර ශ්‍රී ලංකා එංගලන්ත එක්දින තරගාවලියේ ශ්‍රී ලංකා සංචිතය ද නම් කෙරුනා. නායක දිනේෂ් චන්දිමාල්, උපුල් තරංග, සධීර සමරවික්‍රම, නිරෝෂන් දික්වැල්ල, ධනංජය ද සිල්වා, දසුන් ශානක, තිසර පෙරේරා සහ අකිල ධනංජය එම සංචිතය නියෝජනය කරනවා.
දුෂ්මන්ත චමීර, ලසිත් මාලිංග,  අමිල අපොන්සු, ලක්ෂාන් සඳකැන්, නුවන් ප්‍රදීප්, කසුන් රාජිත සහ කුසල් ජනිත් පෙරේරා එක්දින සංචිතයේ සෙසු ක්‍රීඩකයන්.
අතිරේක ක්‍රීඩකයන් ලෙසට ශෙහාන් මධුෂංක, කුසල් මෙන්ඩිස්, දිමුත් කරුණාරත්න, සුරංග ලක්මාල් සහ ජෙෆ්රි වැන්ඩසේ නම්කර ඇති බවයි ශ්‍රී ලංකා ක්‍රිකට් ආයතනය කියාසිටියේ.